ನನ್ನ ಕುಡಿಯ ಆಗಮನ

ಮಾರ್ಚ್ ೨೫ ೧೯೯೬ರ ಸಂಜೆ ನನ್ನ ಮಾವನವರಿಂದ ದೂರವಾಣಿಕರೆ ಬಂದಾಗ ಮನೆಯಲ್ಲಿ ನಾನಿರಲಿಲ್ಲ!
"ಎಲ್ಲಿಗೆ ಅಲೆಯಲು ಹೋಗಿದ್ದೆ?" ಮನೆಗೆ ಬಂದ ಕೂಡಲೇ ನನ್ನ ಮಾತಶ್ರಿಯ ಕೋಪದ ಸ್ವಾಗತ! ಅಲ್ಲಿ ಮಂಗಳೂರಿನಲ್ಲಿ ರಶ್ಮಿ ಆಸ್ಪತ್ರೆಗೆ ಹೆರಿಗೆಗೆ ಹೋಗಿದ್ದಾಳೆ, ಇಲ್ಲಿ ನೀನು ಆರಾಮವಾಗಿ ಸುತ್ತಿಕೊಂಡಿದ್ದಿಯ? ನಿನ್ನ ಮಾವನ ಫೋನ್ ಬಂದಿತ್ತು.. (ಈಗಿನಂತೆ ಆಗ ಮೊಬೈಲ್ ಇರಲಿಲ್ಲ ನೋಡಿ.. ಇದ್ದಿದ್ದರೆ ಬಹುಶ ನನ್ನ ಜೀವಮಾನದಲ್ಲಿ ಪ್ರಪ್ರಥಮ ಬಾರಿಗೆ ಒಂದು ಉಪಯುಕ್ತ ಕರೆ ಬಂದು ನನ್ನ ಅಮ್ಮನ ಕೊಪಾಗ್ನಿಯಿಂದ ತಪ್ಪಿಸಿಕೊಳ್ಬಹುದಿತ್ತೇನೋ?)
ಅರೆಬರೆ ಊಟ ಮಾಡಿ ಮೆಜೆಸ್ಟಿಕ್ ಬಸ್ ನಿಲ್ದಾಣದಲ್ಲಿ ಮಂಗಳೂರಿನ ಬಸ್ ಹತ್ತಿ ಕುಳಿತವನಿಗೆ ರಶ್ಮಿಯ ಚಿಂತೆ (ಇದನ್ನು ಅವಳು ಖಂಡಿತ ಒಪ್ಪಲಾರಳು!) ಮತ್ತೆ ಹುಟ್ಟುವ ಮಗುವಿನ ಚಿಂತೆ... ಇದರ ಒಡನೆ ಮಗಳಿಗೆ ಇಡಲಾಗುವ ಹೆಸರುಗಳ ಕನಸು...
ಬೆಳಿಗ್ಗೆ ಸುಮಾರು ೬ಕ್ಕೆ ಬೆಜೈಅಲ್ಲಿ ಚಿಕ್ಕಮ್ಮನ (ನಾನು ಬಾಯಿತುಂಬ ಕರೆಯುವ ಮೀನಾಕ್ಷಿ) ಮನೆಗೆ ಹೋದ ಒಡನೆ ಅವಳ ಶುಭಾಶಯದೊಂದಿಗಿನ ಸ್ವಾಗತ - ಜೈ ಆಸ್ಪತ್ರೆಗೆ ಫೋನ್ ಮಾಡಿದ್ದೆ, ನಿನಗೆ ಮಗಳು ಹುಟ್ಟಿದ್ದಾಳೆ ಬೇಗ ಸ್ನಾನ ಮಡಿ ತಿಂಡಿ ತಿಂದು ಹೋಗು..
ನನ್ನ ಪ್ರಥರ್ವಿಧಿಗಳನ್ನು ಮುಗಿಸಿದ ಒಡನೆ ಮೀನಾಕ್ಷಿಗೆ - ಮೊದಲು ಮಗಳನ್ನು ನೋಡಿ ನಂತರ ತಿಂಡಿ ತಿನ್ನುತ್ತೇನೆ ಎಂದು ಹೇಳಿ ಮಂಗಳೂರು ನರ್ಸಿಂಗ್ ಹೋಂ ಗೆ ಹೋದೆ.
ಬಾಗಿಲಲ್ಲೇ ಡಾಕ್ಟರ ಪಿ.ಜಿ. ಭಟ್ಟರ (ನನ್ನ ಮಾವ) ಹಸನ್ಮುಖ - ಜೈ ಮೊಮ್ಮಗ ಚೆನ್ನಾಗಿದ್ದಾನೆ...
ಮಾವ, ಮೀನಾಕ್ಷಿ ಹೇಳಿದಳು ಮಗಳು ... ನಾನು ದಿಗ್ಬ್ರಮೆಯಿಂದ ತಡವರಿಸಿದೆ..
ಇಲ್ಲಾ ಮಗ ಹುಟ್ಟಿದ್ದು..
ನಂತರ ಮಗನನ್ನು ನೋಡಿ, ರಶ್ಮಿಯನ್ನು ಮಾತಾಡಿಸಿ ನಂತರ ವಿಚಾರಿಸಿದಾಗ.. ಮೀನಾಕ್ಷಿ ಫೋನ್ ನಲ್ಲಿ ರಶ್ಮಿಗೆ ಹೆರಿಗೆ ಆಯ್ತಾ ಎಂದಾಗ ಅಲ್ಲಿ ಇಬ್ಬರು ರಶ್ಮಿ ಗೆ ಹೆರಿಗೆ ಆಗಿತ್ತು......

ಇಷ್ಟೆಲ್ಲಾ ಅವಾಂತರಗಳ ನಡುವೆ ನನ್ನ ನಿರಾಸೆ, ಮಗನ ಮುಖ ನೋಡಿದಾಗ ನನ್ನ ಮುಖ ಅರಳಿತು.ಅಲ್ಲಿಗೆ ನನ್ನ ಮತ್ತು ರಶ್ಮಿಯ ಕರುಳಿನ ಕುಡಿ ಅಭಯಕೇಶವನ ಆಗಮನವಾಯಿತು.

ಉಪಸಂಹಾರ:

ನಾನು, ಮಗಳಾದರೆ ಯೋಚಿಸಿದ ಹೆಸರುಗಳಲ್ಲಿ ಕೆಲವನ್ನು ನನ್ನ ತೋಟದಲ್ಲಿ ಇರುವ ಹಸುಗಳಿಗೆ ಉಪಯೋಗಿಸಿ ಸಂತಸ ಪಟ್ಟಿದ್ದೇನೆ! ನನ್ನ ಲಕ್ಷ್ಮಿ, ಗೌರಿ, ಲಕ್ಷ್ಮಿಯ ಮಗಳುಗಳಾದ ಕಾಮಧೇನು, ವಾಣಿ, ವಿದ್ಯಾ, ಮಧುರ. ಕಾಮಧೇನುವಿನ ಮಗಳು ಸುರಭಿ ಮತ್ತು ಇಷ್ಟೆಲ್ಲಾ ಹುಡುಗಿಯರ ನಡುವೆ ಇರುವ ಗೌರಿಯ ಮಗ ಗೋಪಾಲಕೃಷ್ಣ! ಇನ್ನೇನು ನನ್ನ ವಾಣಿ ಕರು ಹಾಕುವ ಸಮಯ! ಅವಳಿಗೂ ಮಗಳು ಹುಟ್ಟಿದರೆ ಹೆಸರು ಸಿಂಧು ಎಂದು ಇಡುವ ಯೋಚನೆ.. ನೀವೇನು ಹೇಳುತ್ತೀರಾ?